САДАФМО АЗИМОВА ҒОЛИБИ ОЗМУНИ «ҲАРАКАТИ ЭҶОДИИ НАВИСАНДАГОНИ МУОСИРИ ТОҶИК" ГАРДИД

Садафмоҳ Азимова, хонандаи синфи 11-и Литсейи № 2 барои хонандагони болаёқати шаҳри Душанбе дар даври дуюми лоиҳа-озмуни «Ҳаракати эҷодии нависандагони муосири тоҷик» ғолибият ба даст овард, иттилоъ медиҳад Сарраёсати маорифи шаҳри Душанбе.

Озмун дар ду давр баргузор шуда, дар он беш аз 60 нафар довталабон ширкат варзиданд. Даври аввали озмун тариқи онлайн сурат гирифта, ба он олимону донишмандони шеъру адаб баҳо гузоштанд. Даври дуюми озмун дар китобхонаи шаҳрии ба номи А. Лоҳутӣ баргузор гардида, дар он шахсиятҳои гуногуни ҷомеа, ки ба навиштани шеъру ҳикоя (назму наср) машғул буданд, иштирок карданд.

Масъулини озмун ба Садафмоҳ Азимова туҳфаҳои гаронарзиши ноутбук, китобҳои нодир ва роҳхат ба даври байналмилалии озмун дар шаҳри Москваи Федератсияи Россияро тақдим намуданд.