ШОИРА ЗУЛҚАЙНАРОВА ДАР ЧЕМПИОНАТИ ҶАҲОН ОИД БА БОКС ПИРӮЗ ШУД

11-уми май дар рӯзи 3-юми Чемпионати ҷаҳон оид ба бокс муштзани маъруфи кишвар Шоира Зулқайнарова дар аввалин муҳорибааш дар вазни 63 кг бар ҳарифаш Ҷ. Ноура аз Кувейт пирӯз шуд.
Чемпионати ҷаҳон оид ба бокс миёни бонувон дар шаҳри Истанбули Туркия 9-уми май шуруъ гардида, то 21 май идома меёбад. Дар чемпионат 310 варзишгар аз 73 давлат иштирок доранд.
Ҷумҳурии моро дар ин мусобиқаи бонуфуз ба ғайр аз Шоира, инчунин Сумайя Қосимова (48 кг), Руҳафзо Ҳақназарова (50 кг) ва Миҷгона Самадова (57 кг) намояндагӣ мекунанд.
Ҳарифи Шоира Зулқайнарова дар даври дуюм Ҳадунг Ҷионг аз Корея мебошад. Муҳорибаи онҳо 15 май сурат мегирад.

Сумайя Қосимова дар вазни 48 кг дар даври аввал аз Севда Асенова (Булғория), Миҷгона Самадова (57 кг), ки дар даври аввал озод буд, дар даври дуюм аз Йу Тинг-Линг (Тайпей) мағлуб шуда, аз идомаи муҳорибаҳо маҳрум гардиданд.
Руҳафзо Ҳақназарова бошад, дар вазни 50 кг 12 май муқобили Айда Санталла аз Боливия ба ринг мебарояд.