4 БОНУИ МУШТЗАНИ ТОҶИК ДАР ЧЕМПИОНАТИ ҶАҲОН ШИРКАТ МЕВАРЗАНД

6 - 21 май дар шаҳри Истанбули Туркия Чемпионати ҷаҳон оид ба бокс миёни бонувон баргузор мешавад. Дар ин мусобиқа иштироки 419 варзишгар аз 93 давлати дунё дар назар аст, иттилоъ медиҳад Кумитаи олимпии Ҷумҳурии Тоҷикистон.

Бино ба иттилои Федератсияи бокси Тоҷикистон, Тоҷикистонро дар ин сабқат 4 варзишгар - Сумайя Қосимова (-48кг), Руҳафзо Ҳақназарова (-50кг), Миҷгона Самадова (-57кг) ва Шоира Зулқайнарова (-63кг) намояндагӣ мекунанд. Онҳоро дар ин сафар сармураббӣ Мирзо Шамсиев роҳбарӣ менамояд.

Чемпионати ҷаҳон аз рӯи 12 вазн сурат мегирад ва фонди ҷоизавии он 2,4 миллион долларро ташкил медиҳад. Дар ҳар вазн ғолибону ҷоизадорон чунин маблағ хоҳанд гирифт:

Ҷойи 1:  100000 доллари ИМА;
Ҷойи 2:  50000 доллари ИМА;
Ҷойи 3:  25000 доллари ИМА;
Ҷойи 3:  25000 доллари ИМА.

Дар доираи чемпионат, ҳамчунин Конгресси ғайринавбатии Ассотсиатсияи байналмилалии бокс баргузор мегардад, ки дар он президенти ассотсиатсия ва аъзои Шӯрои директорони ассотсиатсия интихоб мегарданд. Ба вазифаи президенти Ассотсиатсияи байналмилалии бокс номзадии ду нафар – Умар Кремлев (Россия) ва Борис ван дер Ворст (Нидерланд) пешниҳод шудааст.