БОЗДИДИ САРВАЗИРИ МАМЛАКАТ АЗ ШАҲРИ КӮЛОБ

5 апрели соли равон Сарвазири Тоҷикистон Қоҳир Расулзода, раиси вилояти Хатлон Қурбон Ҳакимзода  ва дигар меҳмонон бо мақсади шиносоӣ бо рафти кишти баҳории зироатҳои кишоварзӣ,  корҳои созандагию ободонӣ ва ҷараёни иҷрои корҳои сохтмонӣ бахшида ба таҷлили ҷашни 35-солагии Истиқлолияти давлатӣ  ба шаҳри Кӯлоб ташриф оварданд.             

Қ. Расулзода аз рафти корҳои сохтмонии мактаби ҷамоати деҳоти Зарбдори деҳаи Гулистон дидан намуд.

Корҳои сохтмонӣ дар иншооти мазкур моҳи майи соли 2021 оғоз гардида, тибқи нақшаи корӣ моҳи апрели соли 2022 ба анҷом мерасад. Ин иншооти ҷашнӣ тибқи лоиҳаи тасдиқгардида аз ду ошёна, 11 синфхона, 2  ҳуҷраи корӣ аз ҷумла синфхонаи компютерӣ, ҳуҷраи директор, хонаи муаллимон, ҳуҷраи хоҷагӣ буғхона бо назардошти технологияи ҳозиразамон, анбор барои нигаҳдории ангишт, ҳавзи захираи об ва зеристгоҳи мустақими барқи 160 кВт иборат буда, муассиса барои 528 хонанда дар ду баст ба нақша гирифта шудааст. Ҳамзамон корҳои оҳану бетонӣ, рангу бори дохил ва беруни бино, насбу васли дару тирезаҳо, фаршу шифт пурра ба анҷом расонда шуда, саҳни ҳавлии иншоот сафолакпӯш гардидааст.

Ҳамчунин, корҳои тахту ҳамворкунии майдончаи футбол, волейбол ва баскетбол низ бомаром идома дорад.

Ҷомӣ ЗАРИФЗОДА,

 шаҳри Кӯлоб