МИЁНИ ДАСТАҲОИ МУНТАХАБИ ФУТБОЛИ ЗАНОНА ЧЕМПИОНАТИ CAFA -2022 ДОИР МЕГАРДАД

Аз 19 то 29 январи соли равон таҳти сарпарастии Ассотсиатсияи футболи Осиёи Марказӣ (CAFA) нахустин мусобиқа дар Тоҷикистон - Чемпионати CAFA-2022 оид ба футзал миёни дастаҳои мунтахаби занона доир мегардад, иттилоъ медиҳад Федератсияи футболи Тоҷикистон.

Барои дарёфти мақоми пурзӯртарин дар минтақа чор дастаи мунтахаб байни ҳам мубориза мебаранд. Дар чемпионат дастаҳои футболи  занонаи Эрон, Тоҷикистон, Ӯзбекистон ва Қирғизистон ширкат меварзанд. Дастаи мунтахаби занонаи футзали Тоҷикистонро дар ин сабқат сармураббӣ Шамшод Ниятбеков омода менамояд.

Чемпионати футзали занони CAFA-2022 аз рӯи системаи дудаврӣ баргузор шуда, дар он ҳар даста шаш бозӣ анҷом медиҳад. Дастаи ғолиб аз рӯи шумораи бештари холҳо муайян карда мешавад.

Тамоми бозиҳои мусобиқа дар Маҷмааи варзиши обӣ ва қасри тенниси Душанбе баргузор мешаванд, ки дар як вақт то се ҳазор тамошобинон метавонанд аз рафти сабқатҳо дидан намоянд.