БАХШИДА БА 27-СОЛАГИИ ҲХДТ ДАР ПОЙТАХТ ҲАМОИШИ ҲИЗБӢ ДОИР ШУД

13 декабр дар Донишгоҳи технологии Тоҷикистон бахшида ба 27-умин солгарди таъсиси Ҳизби Халқии Демократии Тоҷикистон аз ҷониби Кумитаи иҷроияи ҲХДТ дар ноҳияи Фирдавсӣ маҷлиси тантанавӣ доир гардид, иттилоъ медиҳад АМИТ «Ховар».

Дар ҳамоиш раиси мақомоти иҷроияи ҳокимияти давлатии ноҳияи Фирдавсӣ Фатҳиддин Усмонзода, Раиси Кумитаи иҷроияи ҲХДТ дар ноҳияи Фирдавсӣ Абдураҳим Шоҳиён, муовини раиси Кумитаи иҷроияи ҲХДТ дар шаҳри Душанбе Ҷӯрабек Муродов, роҳбарони муассисаву идораҳои давлатӣ, аъзои Кумитаи иҷроия, вакилон, раисони ташкилоти ибтидоӣ, намояндагии ТҶҶ “Созандагони Ватан”, аъзо ва фаъолони ҳизб иштирок намуданд.

10 декабри соли равон ба таъсиси ҲХДТ 27 сол пур шуд ва он барои кулли аъзо ва ҷонибдорони ҳизб санаи таърихӣ мебошад.

Раиси КИ ҲХДТ дар ноҳияи Фирдавсӣ Абдураҳим Шоҳиён оид ба таърихи таъсиси ҲХДТ ва Кумитаи иҷроияи ҳизб дар ноҳияи Фирдавсӣ ибрози андеша намуда, гуфт, ки “ҲХДТ ба сифати неруи муқтадири сиёсии кишвар барои воқеан амалӣ гардидани озодиҳои сиёсиву иқтисодӣ - гуногунандешӣ, бисёрҳизбӣ, озодии сухан, матбуот ва эътиқод, интихоботи шаффофу демократӣ, волоияти қонун, иқтисодиёти гуногуншакл, рақобати озоди иқтисодӣ, рушди соҳибкории хурду миёна, ташаккули ҷомеаи шаҳрвандӣ ва монанди инҳо ҳамчун ҳадафҳои барномавии худ то имрӯз талош меварзад. Натиҷаи чунин сиёсати созандаи ҳизб аст, ки намояндагони ҳамаи қишрҳои ҷомеа ифодаи манфиатҳояшонро дар барномаи он дида, ҷонибдорӣ мекунанд”.

Дар идомаи ҳамоиш ба як гурӯҳ собиқадорон ва фаъолони ҲХДТ ҷиҳати саҳми босазо гузоштан дар амалигардонии сиёсати созандаю бунёдкоронаи ҲХДТ бо туҳфаҳои хотиравӣ ва Ифтихорномаи КИ ҲХДТ дар ноҳияи Фирдавсӣ сарфароз гардонида шуда, ҳамчунин ба чанд нафар омӯзгорони фаъоли Донишгоҳи технологии Тоҷикистон, ки бори аввал узви ҲХДТ гардиданд, шаҳодатномаҳои ҳизбӣ дар фазои тантанавӣ супорида шуданд. Чорабинӣ бо барномаи фарҳангӣ ҷамъбаст гардид.