ДАР СУҒД ҒОЛИБОНИ ОЗМУНИ «16 РӮЗИ МУБОРИЗА АЛАЙҲИ ХУШУНАТ» МУАЙЯН ГАРДИДАНД

Дар чаҳочӯбаи Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023 шуъбаи кор бо занон ва оилаи мақомоти иҷроияи ҳокимияти давлатии шаҳри Хуҷанд ва дафтари матбуоти раиси шаҳр озмуни беҳтарин мақола (рӯзнома, сомона), гузориш ва ё барномаи телевизионӣ, ролики иҷтимоӣ дар самти пешгирии зӯроварӣ ва ё хушунат эълон намуда буд.

Дар толори меҳмонхонаи «Суғдиён» аз ҷониби муовини раиси шаҳри Хуҷанд Фирўза Нуруллозода ва сардори Раёсати кор бо занон ва оилаи вилоят Хуршеда Хоҷазода ба ғолибони озмун диплом ва туҳфаҳои хотиравӣ тақдим гардид.

Дар номинаи «Гузориш ва ё барномаи телевизионӣ» муҳаррири ШТР «СМ1» Муҳаббат Муродова мақоми аввал, Фарзона Ҳодибоева муҳарири ШТР «Азия» ҷойи дуюм ва Меҳрангези Абдуаҳад зинаи сеюмро ишғол намуданд. Дар бахши матбуот Фарзона Муродӣ, хабарнигори рўзномаи «Пайк», Мафтуна Исмоилова рўзноманигори мустақил ва Нодир Турсунзода мухбири рўзномаи "Ҳақиқати Суғд» мутаносибан мақомҳои ифтихориро касб намуданд. Дар номинаи «Ролики беҳтарин» ғолибият насиби Меҳрангез Охунова, хабарнигори радиои «Тироз», Муҳайё Шарипова, муҳаррири телевизиони вилояти Суғд ва Фараҳноз Набиева, донишҷўи шуъбаи рўзноманигории Донишгоҳи давлатии Хуҷанд ба номи академик Бобоҷон Ғафуров гардид.

Ҳадафи озмун саривақт хабардор намудани ҷомеа аз раванди қонунгузории кишвар доир ба баробарҳуқуқии зану мард, баланд бардоштани мавқеъи зан дар ҷомеа, пешгирии ҳуқуқпоймолкунӣ нисбати занон ва мушкилоти дорои аҳамияти махсуси иҷтимоидошта, ҳамзамон ҷалби таваҷҷуҳи аҳли ҷомеа ба масъалаҳои ҳалталаби гендерӣ буд.

Манбаъ: Мақомоти иҷроияи ҳокимияти давлатии вилояти Суғд