ТОҶИКДУХТАР БАРАНДАИ ҶОИЗАИ «ДУХТАРОНИ ОСИЁ-2021» ШУД

Зебо Фурқатзода зодаи шаҳри Хуҷанд буда, донишҷӯи Коллеҷи муттаҳидаи ҷаҳонии Сингапур (United World College) аст. Соли равон ӯ барандаи ҷоизаи «Духтарони Осиё – 2021» гардид, - хабар медиҳад АМИТ «Ховар».

Ҷоизаи «Духтарони Осиё» ҳамасола ба занон ва духтарони фаъоли Осиё, ки дар заминаи рушд ва тавсеаи занон саҳм мегузоранд, аз ҷониби Бунёди «Боғи умеди Сингапур» (Garden of Hope Foundation) тақдим мегардад.

Зебо Фурқатзода дар тӯли марҳилаҳои интихобӣ ҳунарҳои нав омӯхта, инчунин аз фаъолияти нависандагияш дар Осиёи Марказӣ хабар додааст. Ӯ ният дорад, ки достонҳои навиштаи духтаронро ҷамъоварӣ ва дар қолаби як китоб нашр намояд. Ӯ умедвор аст, ки ба василаи нашри ин китоб паёми духтарон ба ҷаҳониён расонида мешавад.

Мавриди зикр аст, ки Бунёди “Боғи умеди Сингапур” (Garden of Hope Foundation) созмони ғайридавлатӣ буда,  дар заминаи ҳимоят аз занон ва духтарон, ривоҷи баробарии ҷинсӣ, ислоҳоти омӯзишӣ ва тавонмандсозии занон ва духтарон фаъолият мекунад.

Зебо Фурқатзода хатмкардаи Литсейи физикӣ-математикии № 1 ба номи академик Муҳаммад Осимии шаҳри Хуҷанд буда,  дар озмуни  «Хонандаи соли 2019» дар шаҳри Хуҷанд сазовори ҷойи дуюм  гардида буд.