МАРКАЗИ МИЛЛИИ ТЕСТӢ ДАВРИ АСОСИИ ИМТИҲОНИ МАРКАЗОНИДАШУДАИ ДОХИЛШАВИРО ЭЪЛОН ДОШТ

Аз 1 то 7 июли соли равон даври асосии имтиҳони марказонидаи дохилшавӣ,  имтиҳонҳои эҷодӣ ва маҳорати махсус ба муассисаҳои таълимии таҳсилоти миёна ва олии касбии мамлакат  баргузор мегардад. Имтиҳонҳои эҷодӣ ва маҳорати махсус аз ҷониби масъулони донишгоҳу донишкадаҳо қабул ва баҳогузорӣ гардида, балҳои бадастовардаи ҳар як довталаб аз имтиҳонҳои эҷодӣ ва маҳорати махсус ба Маркази миллии тестӣ фиристода шуда, бо балҳои имтиҳонҳои асосӣ зам мегардад.

Барои таъмини шаффофият ва назорати раванди имтиҳонҳо дар ҳар маркази имтиҳонӣ комиссияи ҷамъиятӣ фаъолият мекунад, ки ҳайати онро мақомоти иҷроияи маҳаллии ҳокимияти давлатии шаҳр ё ноҳияе, ки дар ҳудуди он маркази имтиҳонӣ амал мекунад, муайян ва тасдиқ кардааст.

Довталабоне, ки дар даври иловагии бақайдгирӣ аз 10 то 30 июн ҳуҷҷатҳои худро месупоранд, имтиҳонҳои дохилшавиро баъд аз ҷамъбасти даври асосӣ мегузаранд.