ЧОРАБИНИҲОИ ҶАШНӢ БАХШИДА БА РӮЗИ БАЙНАЛМИЛАЛИИ ҲИФЗИ КӮДАКОН

     Бо ташаббуси Мақомоти иҷроияи ҳокимияти давлатии шаҳри Душанбе бахшида ба Рӯзи байналмилалии ҳифзи кӯдакон дар пойтахт то санаи 1 июни соли равон як қатор чорабиниҳои фарҳангию фароғатӣ ва варзишӣ доир мегардад.

Тибқи маълумоти Раёсати иттилоот ва робитаҳои хориҷии дастгоҳи Раиси шаҳри Душанбе аз 15 то 1 июни соли 2019 дар майдончаҳои варзишии Боғи кӯдакони Муассисаи давлатии “Маркази кӯдакон ва наврасони шаҳри Душанбе” бозиҳои варзишӣ аз қабили футбол, волейбол, шоҳмот, баскетбол доир мегардад. Санаи 29 май то 1 июн Фестивали ҷумҳуриявии наврасон таҳти унвони “Мо насли хушбахти замон” ҷараён ёфта, 30 май барномаи фарҳангии кӯдакона дар Сирки давлатии Тоҷикистон баргузор хоҳад гашт. Ҳамчунин, баргузории чорабинии идона ва дилхушкунанда барои тарбиятгирандагони мактаб- интернатҳои пойтахт, хонаҳои кӯдакон ва муасссисаҳои махсус барои кӯдакони дорои имконияти маҳдуд то 1 июн идома меёбад.

       Санаи 1 июни соли ҷорӣ дар Муассисаи давлатии “Аҳорун” чорабинии идонаи фарҳангиву фароғатӣ бахшида ба “Рӯзи байналмилалии ҳифзи кӯдакон” ва дар майдони атрофи Муассисаи мазкур намоиши ҳунару эҷод, мусаввараҳои беҳтарин ва дастовардҳои кӯдакону наврасони шаҳри Душанбе таҳти унвони “Душанбе - шаҳри орзуҳо”, ҳамчунин озмуни расми беҳтарин, викторина, бозиву озмунҳои гуногуни шавқовар барои кӯдакон доир хоҳад гашт.