Оила – сипари боэътимод

Ҳамасола дар ҷаҳон 15-уми май ҳамчун Рӯзи байналмилалии оила аз соли 1993 бо қарори Маҷмаи умумии Созмони Милали Муттаҳид таҷлил мегардад. Андешаи таъсис додани чунин ҷашн ҳанӯз аз соли 1989 сабзида, ҳадафи он таваҷҷуҳи аҳли ҷомеаи сайёра ба мушкилоти оилаҳост. Аз ҷониби Маҷмаи умумии СММ, ҳамчунин, соли 1994 - Соли оила эълон гардида буд.

Баргузории чунин рӯз имкон фароҳам меорад, ки сатҳи маълумотнокии аҳолӣ оид ба равандҳои иҷтимоию иқтисодӣ ва демографие, ки ба вазъи оилаҳо таъсир мерасонанд, баланд гардад.

Дар Тоҷикистон низ, ҳамасола бо ташаббуси Ҳукумати мамлакат ва Кумитаи кор бо занон ва оилаи назди Ҳукумати Ҷумҳурии Тоҷикистон як қатор чорабиниҳои илмиву маърифатӣ, фарҳангиву варзишӣ ва ғайра баргузор мегарданд. Озмунҳои варзишии оилавӣ ва оилаҳои беҳтаринро ташкил намуда, дар тамоми минтақаҳои ҷумҳурӣ тӯйи домодиву арӯсӣ ва хатнасури кӯдакони оилаҳои камбизоат ба таври ройгон ба роҳ монда мешаванд.

Оила дар фарҳанги мардуми тоҷик ҳамчун ниҳоди муқаддас эътироф гардидааст, ки дар он беҳтарин арзишҳои инсонӣ, амсоли муҳаббату садоқат, самимияту вафодорӣ ва ҳамдигарфаҳмиву таҳаммулгароӣ ташаккул меёбанд. Бо назардошти ин, Сарвари давлат муҳтарам Эмомалӣ Раҳмон соли 2015-ро Соли оила эълон намуданд ва як қатор санадҳои меъёрӣ-ҳуқуқиро дар Кодекси оилаи Ҷумҳурии Тоҷикистон ба тасвиб расондаанд, ки мувофиқи он оила, ақди никоҳ, модар, падар ва кӯдак дар Ҷумҳурии Тоҷикистон таҳти муҳофизати давлат қарор доранд.

Сарвари давлат муҳтарам Эмомалӣ Раҳмон дар оила мақом ва манзалати зан-модарро хеле бузург медонанд ва борҳо дар баромадҳояшон нақши модарро дар тарбияи фарзанд ва солимии хонавода таъкид медоранд. Дар ин радиф, мақоми зан¬ро на танҳо дар оила, балки дар пешрафту ваҳдатгароии ҷомеа ва ҳифзи Истиқлоли давлатӣ ниҳоят бузург мешуморанд. Ҳоло аз шумораи умумии хизматчиёни давлатӣ 25 фоиз, аз ҷумла кадрҳои роҳбарикунанда қариб 20 фоизро бонувон ташкил медиҳанд. Инчунин, занон дар соҳаи маориф 73 фоиз, тандурустӣ 71, фарҳанг 47, бонкдорӣ 39, алоқа 25, аз ҷумла дар соҳаи хизматрасонии иттилоотӣ қариб 40 фоиз мебошанд.

Таъсиси грантҳои президентӣ ба густариши фаъолияти соҳибкории занон мусоидат намуд ва онҳо дар баробари беҳтар сохтани шароити оилавии худ ҳоло ба рушди иқтисоди кишвар низ, таъсири назаррас мерасонанд.