ҚАТЛАМА

Маҳсулоти зарурӣ:

Барои хамир: Оби гарм – 250 г;

Намак – 1 қошуқча;

Равғани растанӣ – 3 қошуқ;

Орд – 600 – 650 г;

Барои зирбак: Равған – 60 мл;

Пиёз – 2 дона;

Қимаи гӯшт – 400 г;

Зарчӯба – 0,5 қошуқча;

Қайлаи помидор – 1 қошуқ;

Намак, мурч ва кабудӣ

Тарзи таҳия:

Пиёзро чоркунҷаи хурд рез карда, мезирбонем ва қимаро илова карда, то нимтайёр шудан мепазем. Намак, мурч, зарчӯба ва қайлаи помидорро ба зирбак ҳамроҳ мекунем. Кабудиро майда карда, бо каме об  ба зирбак илова месозем ва муддати 8 – 10 дақиқа, то бухор шудани оби он мепазем. Аз об, намак, равған ва орд хамир мешӯрем ва 10–15 дақиқа дам медиҳем. Сипас, онро чор зуволача карда, ҳар яки онро тунук мекунем. Зирбаки хунукшударо чор тақсим карда, болои онҳо рехта, лӯлашакл мепечонем ва дам медиҳем. Мисли нон онро мувофиқи ҳаҷми тоба тунук карда, дар тобаи каме равғандор аз ду тараф муддати 10– 12 дақиқагӣ мепазем.

РЕЗАШӮРБО

Маҳсулоти зарурӣ:

Гӯшт – 250 гр;

Равған – 100 мл;

Пиёз – 1 дона;

Помидор – 1 дона;

Картошка – 3 дона;

Сабзӣ – 1 дона;

Нахӯд – 100 г;

Қаланфури булғорӣ – 1 дона;

Сирпиёз – 3 дандона Намак, мурч,

барги лавр, қаламфури сурх ва дигар

кабудиҳои хушк – мувофиқи табъ

Тарзи таҳия:

Гӯштро чоркунчаи ҳаҷман миёна ва пиёз, сабзӣ, картошка, қаланфури булғорию помидорро дар шакли чоркунҷаи хурд – хурд реза мекунем. Сирпиёзро бо паҳлуи корд зер карда, майда менамоем. Гӯштро андаке таф дода, намак мезанем ва ҳамаи маҳсулоти резашударо илова карда, мезирбонем. Нахӯдро андохта, 1 литр об мерезем. Баъди ҷӯшидан дар оташи паст мепазем ва мувофиқи табъ кабудиҳои тару хушк ҳамроҳ менамоем.