ДАСТАРХОН

ТАРАБХОНАИ «PAYITAHT»

     Бинои зебои тарабхонаи туркии «Payitaht» (Пойтахт), ки дар канори хиёбони Рӯдакӣ дар буриши кӯчаи Бухоро бо тарҳи мудерну замонавӣ қомат афрохта аст, моҳи сентябри соли равон дари худро ба меҳмонону сокинони Душанбе боз намуд.

Ин ҷо барои мизоҷон хӯрокҳои болаззати туркӣ пешкаш мегарданд.

Тавре сарошпази тарабхона Эрдем мегӯяд, хӯрокҳои туркии «Донер кебаб», «Тавук пирзола», «Кюлбасти», «Бейти кебаб», «Урфа кебаб», «Стейк», «Сарма» аз маъмултарин хӯрокҳои фармоишианд.

Хӯриши «Табуле»

Маҳсулоти зарурӣ:

Як бандча гашниз;

Як бандча пиёз;

10 - 15 дона барги пудина;

Помидор – 2 дона;

Шарбати лимӯ;

Равғани зайтун;

2 - 3 қошуқ биринҷи арабии булғур.

Биринҷро дар об пухта мегирем. Кабудиҳоро миёна ва помидорро чоркунҷа реза намуда, биринҷи пухтаро бо онҳо омехта мекунем. Болои маҳсулот каме шарбати лимӯ ва равғани зайтун омехта, мувофиқи табъ намак мекунем.

Нӯши ҷон!

Таоми
«Япрак бейти донер»

Маҳсулоти зарурӣ:

Гӯшт – 500 г;

Пиёз - 2 дона;

Чапотӣ (лаваш);

Хуштаъмиҳо (зира, мурч, паприка, намак, сирко, пудинаи кӯфта)

Қаблан гӯшти хуштаъмшударо реза карда дар равғани кам мезирбонем. Пиёзро чоркунҷа реза намуда ҳамроҳи гӯшт дар чапотӣ (лаваш) мепечонем ва болои мангал дар сихҳо 3 - 5 дақиқа таф медиҳем.

«Япрак бейти донер»-и мо тайёр, метавонед бо картошкаи хушк ва сабзавот оро диҳед.

Бо иштиҳои том!

                   Ҳалвои туркӣ

маҳсулоти зарурӣ:

3 литр шир;

1 кг шакар;

Мағзи бодом – 100г;

Мағзи писта – 100г.

Тарзи таҳия:

3 литр ширро бо 1кг шакар омехта намуда, то зард шудани маҳлул меҷӯшонем. Сипас, мағзи бодом ва пистаро ба он омехта, то сахт шудани ҳалво пухтанро идома медиҳем. Муҳлати омода шудани он тақрибан 30 дақиқа.

Ҳалвои тайёршударо ба рӯи лаълӣ гирифта, бо корд ба шакли дилхоҳ мебурем.