ОЙЛОВА

Ойлова як намуди хӯроки миллии баҳории кӯҳистониён аст. Тарзи омода намудани он дар ҳар минтақа гуногун мебошад. Аввали баҳор, замони бедоршавии табиат бонувони русто аз гиёҳҳои худрӯйи кӯҳу саҳро ин хӯроки дилнишинро мепазанд.

Барои тайёр намудани ойлова гиёҳҳои худрӯи тару тозаи гӯши бузак, раҳдавак, пудина, сиёҳалаф, 

ҷоҷӣ, каравчак, шибит, ҷамилак, барги зуф, 

барги рошак, об ва каме орд зарур аст.

Тарзи пухтанаш чунин аст: дар деги калон оби соф 

рехта алафҳои зикршударо шуста, реза ва намак карда меандозем. 

Ҳамаи ин маҳсулотро дар оташи баланд қариб як соат меҷӯшонем. То замони ба ҷӯш омадани алафҳо, дар косаи оби хунук як пиёла гарди ордро маҳлул карда, пас аз пухтани алафҳо ба он маҳлули тайёршударо ҳамроҳ мекунем. Дар оташи паст боз 10-15 дақиқа меҷӯшонем. Фаромӯш набояд кард, ки вақти ҳамроҳ намудани маҳлули орд ғизои дегбударо кофтан лозим меояд.

Дар баъзе ноҳияҳо баъди пухтани алафҳо ордро умоч карда ба дег меандозанд ва сипас 5-10 дақиқа мекобанд.

Ин таомро аслан дар табақи чӯбӣ бардошта, мувофиқи табъ ба он дуғу кабудӣ ҳамроҳ намуда, барои хӯрдан пешкаш мекунанд.

Наргис САЙФУЛЛОЕВА,

ноҳияи Данғара