ХОНИ НАВРӮЗӢ

Рубич

Як косаи чинӣ орду дар дуғовии дигар каме обро бо намак омехта, дастҳоро дар об таркунон хамирро мехелед. Баъд ӯмочро бо элак бехта, равғани маскаро доғ намуда, маҳсулотро ба даруни он меандозед. То сурх шуданаш омехта намуда, ба он каме об мерезед. Агар сахт ояд, боз каме ба он об рехта ба дарунаш пиёзи сафеду сабз, гашнич ва намак меандозед. Баъд онро дар лаълӣ гирифта ба дастархон мегузоред.

Оши бурида

Мувофиқи зувола ордро гирифта, баъдан як дона тухм меандозеду намакашро зиёдтар гирифта об мерезед. Хамирашро зиёдтар хелидан лозим. Ва чор - панч зувола мегиред. Баъд дар дег об андохта, нахуд, олуча, лубиёро дар он меҷӯшонед. Зуволаро бо ухлоқу тахта тунук намуда, бо корди махсус онро тунук мебуред. Баъд онро дар табақ бо каме обаш гирифта,дар болояш пиёзу гашничу помидору бодиринг ва чака меафзоед.

Оши туппа

Оши туппаро низ ба мисли оши бурида омода мекунанд. Каме орд ва намаку обро якҷоя карда хамир мехелед. Баъд хамирро зувола мегиред. Зуволаро дар ухлоқ печонида аз байнаш мебуред. Пас аз ин онро боз чоркунҷа буридан лозим. Дар дег обро ҷӯшонда, ба он табъи завқ нахуду лубиё ва пудинаву гашничу пиёз андохта ҷӯш медиҳед. Сипас оши туппаро ба дарунаш меандозед ва онро дар лаълӣ гирифта, болояшро бо чакаву гашничу пиёзу помидор оро медиҳед.

Кадуи таги алов

Сари кадуро гирд бурида, дарунашро тоза мекунед. Пиёзи сафеди майдакарда, гӯшти бурида, равғани яхин, мурч, зира ва намакро омехта даруни каду меандозед ва даҳонашро мебандед. Пас аз хамир бастан кадуро бо лат­таи тунуки тар печонда, ба дегдон меандозед ва болояшро бо лахчаи сӯзон пӯшонда то саҳар дар он ҷо мемонед. Баъд латтаро кушода, чор пораи дарозак бурида, сипас онро майда–майда намуда, дар табақча мегиред ва болояшро мувофиқи табъ бо гашничу пиёз ва помидор оро медиҳед.

Таҳияи МАДИНА