ИНТИХОБИ ДУРУСТИ ТАРБУЗ

— Агар болои пӯсти тарбуз хокаи сафед пайдо бошад, беҳтараш онро нахаред. Дар пӯсти тарбуз ягон нуқтачаи пӯсида ба чашм расад, бидонед, ки ба он селитраро бо сӯзандору гузаронидаанд. Дар сурати дар тани тарбуз ба чашм расидани кафидагӣ ва дигар зарбаҳо ҳам аз харидан худдорӣ кунед.

— Ранги думчаи тарбуз зардчатоб ва каме хушк бояд бошад. Ин маънои онро дорад, ки тарбуз аллакай  пухта аст. Агар думчааш канда  шуда бошад, пас фурӯшанда  камбудиии молашро пинҳон карданист.

— Агар дар тани тарбуз доғи начандон калони зардчатоб бошад,  маънои онро дорад, ки тарбуз худаш пухта расидааст. Агар ин доғ калонтар бошад, пас ба тарбуз нури офтоб кам расидааст. Таъми ин гуна тарбуз болаззат нест. Обаш зиёдтару шириниаш камтар аст.

— Тарбузи пухта бо баробари задан садои махсус мебарорад. Агар тарбуз хом бошад, садояш пасту вақти задан дастатон дард мекунад.  Ҳаргиз тарбузҳои калонҳаҷм нахаред. Агар шумо ҳамроҳи дӯстон ва ҳамкорон ба ҷое ба истроҳат рафта истода бошед, ба ҷойи як тарбузи калон беҳтараш якчанд тарбузи майдатар гиред.— Маслиҳат дода мешавад, ки пеш аз пора кардан тарбузро ҳатман бишӯед. Ҳангоми шустани тарбуз низ то чӣ андоза пухта будани онро муайян кардан мумкин аст. Агар тарбуз даруни об биғӯтад, пас он хом аст, агар рӯйи об барояд, он хуб пухта аст. Баробари корд задан тарбузи пухта мекафад, ки ранги донакҳояш қаҳваранги сиёҳчатоб аст.

  Гулноз