«ЧЕҲРА»-ҲО КУШОДАНД

Хонандаи мӯҳтарам, ҳар кадоме аз шумо имкон доред, ки аз навиштаҳои муаррифгаронаи нашрия, худ доварӣ намоед, ки оё воқеан ин бонувон сазовори мавқеву мақоми аз имрӯз доштаашон болотаранд ё на.

Маҷаллаи шумо тасмим гирифтааст, ки баъдан низ ин иқдомро идома бидиҳад ва домони маъракаи муаррифии чеҳраҳои сазоворро аз ҳисоби бонувон васеътар бисозад. Яъне «Бонувони Тоҷикистон» минбарест, ки дар тарғиби фаъоляти занҳои арзишманди тоҷик баъдан низ саҳим хоҳад монд.

Перомуни ҷамъбасти озмун дар шумораҳои баъдӣ иттилоъ хоҳед пайдо кард. Мекӯшем, ки ҷамъбасти озмуни он «чеҳра»-ҳое, ки тули 5 моҳ муаррифиашон пешниҳоди шумо гашт, дар як маҳфили олие бо ширкати эшон баргузор гардад, то ҳакамон ва ҷомеаи васеътаре аз наздик бо онҳо ошноӣ пайдо намояд.

     Ҷамъбасти озмуни «Чеҳракушоӣ»-ро бо ҳам интизор бошем ва гузашта аз он таманнои онро дорем, ки ҳар кадоме аз ин мутахассисин мавқеву мақоми арзандаи хешро биёбаду ба ин миллату ба ин Ватан хидмати покдилона намояд. То мо бо ифтихор гуфта тавонем, ки нақши занон дар ҷомеаи демократии Тоҷикистон рӯшану воқеъист. То ин бонувон бо заковату истеъдоди хеш битавонанд, ки сафи чеҳраҳои намоёни сиёсиву иҷтимоии бонувонро дар кишвар биафзоянд.