«Тоҷиконхонӣ» –Озмуни таърихӣ

Китоби «Тоҷикон»-и аллома Бобоҷон Ғафуров, ки дар даврони сарнавиштсоз, муаррифгари халқу миллати тоҷик буд, аз муҳаббату хайрхоҳии Пешвои миллат муҳтарам Эмомалӣ Раҳмон китоби рӯйимизии ҳар хонадони тоҷик гардид.

Роҳандозии Озмуни ҷумҳуриявии ««Тоҷикон»-оинаи таърихи миллат» ба хотири гиромидошти 115-солагии академик Бобоҷон Ғафуров аз шарифтарин иқдомҳои Сарвари давлат баҳри миллати тоҷик буд. Мақсад аз баргузории чунин Озмуни сатҳи баланд ҷиҳати арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корномаҳои шоистаи ниёгон дар давоми таърих, тақвияти ҳисси худогоҳӣ ва худшиносии миллӣ, эҳёи ҳофизаи таърихӣ ва ба ҳамин роҳ шинохти беҳтари нақши миллати куҳанбунёду фарҳангсолори тоҷик дар рушди тамаддуни инсоният, ки бо далелҳои раднопазир ва бо такя ба сарчашмаҳои илмиву таърихӣ дар китоби мондагору пурарзиши академик Бобоҷон Ғафуров «Тоҷикон» ва дигар асарҳои таърихӣ инъикос ёфтааст, арзёбӣ гардид.

Аз 140 ҳазору 787 нафари довталаб дар давраҳои аввал 115 нафар аз хонандагони синфҳои ибтидоӣ то пирони барнодили 90-сола ширкаткунандагони даври ниҳоии озмун шуданду беҳтаринҳо ғолиб омаданд. Нишоту фараҳ ва сарфарозии ғолибон ва ширкаткунандагони даври ниҳоии Озмуни ҷумҳуриявии «Тоҷикон»-оинаи таърихи миллат», ки дар фазои тантанавӣ бо ҷоизаҳои хосаи Озмун қадр гардиданд, ҳам аз дарёфти ҷоизаҳосту ҳам аз ошноии бештар бо тамаддуну таърихи кишвари худ.

Мирмуҳсин Мирдодоев — хонандаи синфи 10-и Литсейи давлатии №1-и шаҳри Бохтар, аз байни хонандагони муассисаҳои таҳсилоти миёнаи умумӣ (синфҳои 5–11) ва ибтидоии касбӣ, Навраста Дӯстова — омӯзгори Донишгоҳи давлатии омӯзгории Тоҷикистон ба номи С. Айнӣ аз миёни омӯзгорони ҳамаи зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, аспирантон, унвонҷӯён, номзадони илм ва докторантҳои муассисаҳои таҳсилоти олии касбӣ ва муассисаҳои илмӣ, Ҳасани Назар - сарбози қисми ҳарбӣ аз ноҳияи Данғара, дар гурӯҳи калонсолон ва намояндагони касбу кори гуногун ва аз шумори донишҷӯёни муассисаҳои таҳсилоти миёна ва олии касбӣ (бакалавр, магистр) донишҷӯи курси 4-уми Донишгоҳи миллии Тоҷикистон Шоира Давлатзода бо маҳорати баланди ҳозирҷавобӣ, дониши амиқу мустаҳкам ва огоҳии комил аз китоби «Тоҷикон» ва таърихи халқи тоҷик бо касби холҳои баландтарини ҳакамон ба дарёфти Шоҳҷоиза бо маблағи 70 ҳазор сомонӣ мушарраф гаштанд.

Ин Озмуни бошукӯҳу фарогир барои муаррифии донишмандони нави соҳаи таърих, худшиносиву меҳанпарастии қишрҳои гуногуни ҷомеа, падидаи зеботарин дар соли 2023 буд, ки бори дигар ба китобдору китобхон ва соҳиби таърихи бузург будани халқи тоҷик бурҳони раднашаванда гардид.