Иҷлосияи XVI шурои олӣ ва эҳёи худшиносии миллӣ

9 ноябр дар Китобхонаи миллии Тоҷикистон Конфронси ҷумҳуриявии «Иҷлосияи XVI Шурои Олӣ ва эҳёи худшиносии миллӣ» доир гардид. Дар ҳошияи конфронс Озмуни ҷумҳуриявии рӯзномаи «Ҷавонони Тоҷикистон» таҳти унвони «Иҷлосияи XVI Шурои Олӣ ва эҳёи худшиносии миллӣ», ки зери сарпарастии Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо раёсатҳои кор бо ҷавонон ва варзиши шаҳри Душанбе ва вилояти Суғд эълон гардида буд, ҷамъбаст шуд. Ҳамчунин, дар доираи ин чорабинӣ китоби «Иҷлосияи XVI Шурои Олӣ ва эҳёи худшиносии миллӣ», ки фарогири маводи озмуни мазкур буд, рӯнамоӣ шуд.

Дар конфронс Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Шодихони Назар, сармуҳаррири рӯзномаи «Ҷавонони Тоҷикистон», Дилрабо Мансурӣ, муовини Раиси Маҷлиси намояндагони Маҷлиси Олии Ҷумҳурии Тоҷикистон, Хидирзода Махфират, доктори илмҳои фалсафа, профессор, Ато Ҳамдам, Нависандаи халқии Тоҷикистон ва дигар намояндагони вазорату идораҳо ва васоити ахбори оммаи Тоҷикистон иштирок ва суханронӣ намуданд.

Пас аз анҷоми суханрониҳо ғолибони Озмуни ҷумҳуриявии «Иҷлосияи XVI Шурои Олӣ ва эҳёи худшиносии миллӣ» бо мукофотҳои моливу пулӣ қадр гардиданд.

Ҳамзамон, дар ҷамъбаст намояндагони васоити ахбори омма, мақомоти давлатӣ ва иштирокчиёни фаъол барои саҳми муносиб дар татбиқи сиёсати давлатии ҷавонон, тарғиби дастовардҳои замони соҳибистиқлолӣ, таҳкими худшиносии миллӣ миёни аҳли ҷомеа ва иштироки фаъолона дар озмуни мазкур бо сипосномаҳо сарфароз шуданд.

Ф. ВОСЕЕВА