МЕРОСБАРОНИ БЕРУНИВУ РОЗӢ

    Тибқи тадқиқоте, ки дар Олмон ва ИМА миёни хонандагон гузаронда шуд, аён гашт, ки 90 дарсади мактаббачагон фанҳои физика ва риёзиро куллан хуш надоранд ва омӯзиши онҳоро бағоят мушкил медонанд. Чунин беэътиноӣ ба фанҳои дақиқ миёни бархе аз муҳассилини муассисаҳои таълимии Тоҷикистон низ мушоҳида мешавад. Хушбахтона, сафи хонандагоне, ки ба фанҳои мазкур шавқи беандоза доранд, кам нестанд. Яке аз беҳтарин муассисаи таълимии ҷумҳурӣ, ки ба омӯзиши фанҳои дақиқ бештар афзалият медиҳад, Литсей  интернати тоҷикӣ - русии «Ҳотам ва П.В.» мебошад, ки дастпарварони он дар озмуну олимпиадаҳои ҷумҳуриявию байналмилалӣ медалу ҷоизаҳои зиёд ба даст овардаанд.

Далер Пиров, хонандаи синфи 11 литсейи мазкур, ки ба омӯзиши фанни физика ҷиддан камар бастааст, зиёда аз 1000 формуларо аз бар намуда, дар ҳалли мушкилтарин масъалаҳои фаннӣ дастболосту аз қонуну қавоиди физикӣ баҳравар аст.

Соли 2019 вай дар олимпиадаи байналмилалии Жаутикови Қазоқистон (самти физика) ширкат варзида, соҳиби меда- ли тилло гардид. Ҳамчунин, дар озмоиши шуои лазерӣ олимони соҳаро ба ҳайрат овард: қабл аз дигарон муайян сохт, ки аз нурполои шишагии гуногунранг ранги зард зиёдтар хориҷ мегардад. Дар принтерҳои 3Д офаридани суроби роботҳо, мошинҳо ва киштиҳоро низ меомӯзад. Соли 2019 дар олимпиадаи байналмилалӣ оид ба нанотехнология, ки дар Донишгоҳи давлатии Москва ба номи Ломоносов доир гардид, миёни ҳамсолонаш ҳамчун нанотехнологи беҳтарин дониста шуда, бо дипломи дараҷаи 1 сарфароз гашт. Соли 2018 аз олимпиадаи байналмилалии Авруосиё оид ба барномасозӣ ва худи ҳамон сол дар олимпиадаи ҷаҳонӣ оид ба физика дар Португалия медалҳои нуқраро ба даст овард. Соли 2017 дар олимпиадаи илмии шаҳри Боку соҳиби медали тилло гардид. Ҳамчунин, дар озмунҳои байналмилалӣ дар Ҳиндустон, Индонезия ва Таиланд аз рӯи фанҳои дақиқ мақоми шоёнро ишғол намуд. То синфи 7 ба фанни риёзӣ завқ дошт ва баъдан ба илми физика рӯ овард.

- Фанни физика бароям ҷолибу писандидатар аст, зеро дар олам тамоми чиз аз рӯи қонунҳои физикӣ амал менамояд. Баъди омӯзиши амиқи ин фан ба бисёр суолҳои худ посух ёфтам. Фанни физика бо фанни риёзӣ сахт алоқаманд аст, аз ин рӯ, донистани он низ муҳим мебошад, - мегӯяд ӯ.

Дар оянда ният дорад, ки бо технологияҳои кайҳонӣ кор ги рад. Алҳол, барои дохил шудан ба Институти технологии Масса- чусетси ИМА омодагӣ мебинад.

Дориюш Хайриддинов, хонандаи синфи 8-уми ҳамин литсей интернат, риёзидони хуб аст. Аз хурдсолӣ ба фанни риёзӣ шавқ пайдо намуд. Соли 2018 дар олимпиадаи байналмилалӣ оид ба математика миёни наврасон (1М0) дар Булғористон ширкат варзида, медали биринҷӣ ба даст овард. Соли 2019 дар олимпиадаи байналмилалии риёзӣ ва гуманитарӣ низ сазовори медали биринҷӣ гардид.

- Агар ба ин ё он фан шавқу ҳавас набошад, омӯзиши иҷборӣ самар намеорад. Дар олимпиадаҳои риёзӣ рақамҳои бешумори масъалаҳоро, ки ҳисоб намудани онҳо қариб ки ғайриимкон аст, танҳо бо зиракӣ ҳал мебояд кард. Дувум ин ки, ҳарчанд дониш қавӣ бошад, тарси ба хато роҳ надодан вақтро зоеъ менамояд. Дар ҳама ҳолат ором бояд буд, - мегӯяд Дориюш.

Вақти бештари худро ба омӯзиши фанни риёзӣ бахшида, дар радифи он ба омӯхтани фанҳои физика, химия, информатика ва забони англисӣ камар бастааст. Мегӯяд, ки хонандагон имкон доранд, ки шурӯъ аз тарҳрезии барномаҳо то ба мустақилона сохтани схема ва роботҳо даст зананд. Барои ин роҳбарияти литсей-интернат саъй менамоянд, ки ҳини ҳар сафар ба хориҷи мамлакат асбобу дастгоҳҳои заруриро барои чунин озмоишҳо бихаранд.