"МЕҲВАР"- МЕҲР МЕОВАРАД

Соли 2020 ҳеҷ аз ёдам намеравад. Замоне, ки бори аввал навиштаҳоям дар маҷаллаи «Меҳровар» ба табъ расиданд. Аҷаб туғёну ҳаяҷону ларзише дар дилам буд. Ходимони маҷалла маро бо чеҳраи кушод, бо дили нарму меҳрубон ва махсусан, сармуҳаррир Шарофат Отаева бо лутфу ширинзабонӣ пешвоз гирифтанд ва руҳбаланд намуданд. Онҳо барои хубтару беҳтар навиштанам маслиҳатҳо доданд.

Шарофатбону занест, ки сиришташ аз меҳру муҳаббат саршор буда, дӯстиаш самимию холисона ва худаш дур аз ҳар гуна кибру ғурур аст. Хоксору рамузфаҳм, худогоҳу меҳнатӣ, оромтабиату ботамкин. Аз муносибаташ, аз навиштаҳои дилошӯби маҷаллаи тозанашраш маълум аст, ки туғёни қалби поки ин бонуи равшанзамир рӯи саҳфа меояд ва хомааш рангомезиҳо мекунад. Саодати зиндагиашро бо як ҷаҳон ҳисси ватандорию меҳанпарастӣ ифшо месозад ва бо як ҳарорати гарму самимӣ мегӯяд:

Зи обруву номи ту,

Ҳамеша босаодатам.

Ту ки пур аз шарофатӣ,

Манам яке Шарофатам.

Мисли шамъ афрӯхтан кори на ҳар зан аст. Зиндагии ибратбахши ӯ мисли шамъ аст, дар шаби тор. Чунин занонро кору пайкорашон шоистаи пайравию ибрати ҷавонон аст. Шахсан, баъд аз ошноии рӯзгори ӯ ва фаҳмидани аспсавориҳову матонаташ ба вай пайравӣ кардан мехоҳам. Ин бонуи ҳунар имрӯзҳо ба симати сардабири маҷаллаи «Меҳровар»-и нашрияи Мақомоти иҷроияи ҳокимияти давлатии вилояти Хатлон фаъолият мебарад. Дар ин ҷода низ устувор аст ва мекӯшад, то беҳтарин чеҳраҳои Хатлонро аз ҳисоби бонувон, ки рӯзгорашон шоистаи пайравию ибрат ва таҳсину таъриф аст, муаррифӣ намояд. Бешак, муаллим низ худ аз зумраи чунин занҳост, арзандаву лоиқи сипосу қадрдонӣ.

Ҷаҳонсӯзу ҷаҳонороӣ, эй зан,

Сутуни гунбади миноӣ, эй зан.

На танҳо қалъаи дилҳоӣ, эй зан,

 Меҳронаи АБУДЛЛО