ТАМАННИЁТИ ИДОНА

Вазири молияи Ҷумҳурии Тоҷикистон Файзиддин Қаҳҳорзода

Ташаккули ҷомеаи ҷаҳон ва тамаддуни башарӣ бешак ба Зан-Модар сахт алоқаманд аст. Ҳангоме ки сухан дар бораи наздиктарин шахс меравад, бемуҳобот ин гуфтаҳои Сарвари давлат муҳтарам Эмомалӣ Раҳмон ба хотир мерасанд:

«Модар азизтарин вуҷуди рӯи замин мебошад ва зиндагӣ аз нафаси гарму дилнавози ӯ оғоз мегирад. Мо вуҷуди муқаддаси модарро аз аввалин лаҳзаҳои ҳаёт то дами вопасин фаромӯш намекунем, чун ӯ ҳангоми шодиву нишот ва ғаму андуҳи зиндагӣ ҳамеша ҳамроҳи мост».

                         Идатон муборак, бонувони азизу арҷманд!

Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода

Модар пас аз Худованд қудрати офариниш дорад. агар Офаридгор одамро дар ин дунё ҳаст кард, модар насли инсонро таваллуд намуд. Тамоми инсонҳо маҳз дар домони поки модар ба воя мерасанд ва ба мартабаву мақомҳои баланд молик мешаванд. Аз ин рӯ, бузургон модарро сарчашмаи ҳаёт ва гавҳари ноёб маънидод кардаанд, ки ҳақ бар ҷониби онҳост. Расидан ба қадру манзалати модарон, иззату эҳтиромашонро ба ҷо овардан ва дӯст доштани онҳо вазифаи ҷонии ҳар як инсон мебошад.

Боиси хушнудист, ки имрӯз занону духтарони Тоҷикистон дар маркази таваҷҷуҳи Ҳукумати ҷумҳурӣ қарор доранд ва Президенти муҳтарами Тоҷикистон Эмомалӣ Раҳмон баҳри баланд бардоштани мақом ва манзалати онҳо дар ҷомеа пайваста тадбирҳои муҳиму саривақтӣ меандешанд.

Аз самими қалб кулли бонувони мамлакатро ба Рӯзи Модар шодбош намуда, ба онҳо саломативу сарбаландӣ, хушбахтиву саодатмандӣ ва беҳтарин хушиҳои зиндагиро орзу менамоем.

                   Идатон муборак, бонувони азизу арҷманд!