БОНУИ ГЕНЕРАЛ ДАР АФҒОНИСТОН

     Бонуи афғон Ҳотул Муҳаммадзой соли 1966 дар оилаи серфарзанд (7 писару 2 духтар) дар шаҳри Кобул ба дунё омадааст. Падараш корманди гумрук буд. Вақте Ҳотул ҳамагӣ 6 сол дошт, падараш аз олам даргузашт.

     Соли 1983 пас аз хатми мактаби миёна Ҳотул тасмим гирифт, то дар Қувваҳои мусаллаҳи Ҷумҳурии Афғонистон хизмати ҳарбӣ намояд. Ӯро дар қисми ҳавоӣ – десантии ҳарбӣ қабул намуданд. Дар рафти омодагиҳои ҷангӣ дар баробари мардҳо неруи худро нишон медод. Соли 1984 аввалин бор аз парашют ба замин парвоз анҷом дод.

   Ҳотул таҳсилдидаи факултаи ҳуқуқшиносии Донишгоҳи Кобул буда, аллакай замони донишҷӯӣ рутбаи афсариро соҳиб шудааст.

   Соли 1990 Ҳотул ба афсаре, ки дар қушунҳои ҳукуматии кишвари Афғонистон адои вазифа мекард, ба шавҳар баромад. Баъди як соли оиладорӣ шавҳараш дар яке аз ҷангҳо кушта шуд ва Ҳотул бо писари хурдаш танҳо монд. Ҳамчунин, ду бародараш дар ҷанги шаҳрвандӣ кушта шуданд.

   Баъди барҳам хӯрдани сохти давлатдории Наҷибулло соли 1992 Ҳотул ба ҳайси сарвари бонувон дар қисми ҳарбии омодагии ҷисмонӣ интихоб гардид. Ҳотул бо сабабҳои маълум маҷбур шуд, то муваққатан аз кораш даст кашад. Ӯ роҳи пайдо намудани даромадро аз дӯхтани сарулибос ёфт. Дар баробари ин ӯ ба мактаби занонае, ки пинҳонӣ амал мекард, роҳбарӣ менамуд.  

   Соли 2003 бо аз сари қудрат дур шудани толибон Президенти кишвари Афғонистон Ҳамид Карзай ин бонуи шуҷоъро ба вазифаи муовини директор оид ба кор бо занони Артиши миллии Афғонистон таъйин намуд. Баъдан соли 2006 Ҳотул сарварии ин сохторро ба уҳда гирифта, якбора бо рутбаи генералӣ сарфароз шуд.

 Замони адои хизмат дар Артиши миллии Афғонистон се маротиба сӯиқасд ба ҷони ин бонуи нотарсу далери афғон намудаанд.

     Аз соли 1984 то 2006 Ҳотул 572 маротиба амалиёти ҷаҳиданро бо парашют аз дастгоҳҳои гуногуни парвозкунанда анҷом додааст.

      Ҳотул Муҳаммадзой тӯли фаъолияти 30 солааш дар маснади ҳарбӣ сазовори 35 медалу ифтихорномаҳои ҳукуматӣ гардидааст.

Аноҳито