ФОИДАИ ОФТОБ БА КӮДАК

Ҳамаи волидон мехоҳанд, ки кӯдаконашон солим ба воя расанд. Оё нурҳои баҳории офтоб ба саломатии кӯдакон фоидаовар аст?

Бо ин суол ба Латофат Хоҷаева - духтури оилавӣ аз Маркази саломатии шаҳрии 2 посух мегӯяд.

- Нурҳои ултрабунафши офтоб ба кӯдакон манфиатбахш аст, зеро он метавонад витамини D -ро дар пӯст ҳосил намояд. Аксари кӯдаконе, ки дар фасли тирамоҳу зимистон таваллуд мешаванд, аз норасоии нурҳои офтоб метавонанд ба бемори “рахит” гирифтор мешаванд. Ин гуна кӯдакон ноороманду зиёд ғаш мекунанд. Норасоии витамини D ҳамчунин метавонад ба каҷшавии устухонҳо орад, - мегӯяд Л. Хоҷаева.

Ӯ тавсия медиҳад, ки кӯдакро ҳамарӯза 15 дақиқа дар ҳавои тоза аз соати 8 то 10 сайр кунонанд. Пас аз соати 11 то 16 сайругашт тавсия дода намешавад, зеро ин ба саломатӣ зараровар аст.

Сайругашт хусусияти оромбахшӣ дошта, иштиҳои кӯдакро меорад ва хоби бароҳатро фароҳам меорад.

Нурҳои офтоб кӯдакро аз бемориҳои роҳҳои нафас, ҳассосият, рӯдаву меъда ва бемориҳои асаб ҳифз менамояд.

Ҳамчунин, либоси кӯдак бояд аз матоъҳои пахтагӣ ва бидуни рангу тобишҳои торик бошад.

Модаронро зарур аст, ки барои тандурустии фарзандони хеш вақт ҷудо намоянд ва ба ин масъала ҷиддӣ муносибат созанд.