«БОХТАРИЁН» - ИНФРАСОХТОРИ МУВАФФАҚИ САЙЁҲӢ!

Дар даромадгоҳи шаҳри Бохтар меҳмонхонаи зебою замонавие бо номи «Бохтариён» амал мекунад. Меҳмонхона соли 2016 аз ҷониби соҳибкори маҳаллӣ Ҷовид Исмоилзода сохта ба истифода дода шудааст.

«Бохтариён» давоми се соли фаъолият мизбони меҳмонон аз давлатҳои Россия, Ӯзбекистон, Қазоқистон, Олмон, Амрико, Эрон, Туркия ва дигар давлатҳои дунё будааст, ки эшон дар китоби хотираҳо ангоштаҳои неку сипосманд будан аз аҳли кормандонашро ҳаккокӣ намудаанд.

«Бохтариён» аз чаҳор ошёна иборат буда, 24 ҳуҷраи муҷаҳҳаз бо тамоми шароити муосири зисту зиндагист. Меҳмонхона дар як вақт метавонад ба 40 нафар хизмат расонад. Дар фурсати начандон зиёди фаъолият бо хизматрасонии олӣ ва ҷои роҳати истироҳату фароғат, бо нархҳои дастрас макони дӯстдоштании меҳмонони дохиливу хориҷии шаҳр гардидааст.

Дар баробари ҳуҷраҳои барҳаво «Бохтариён» дорои толору маҷлисгоҳҳои замонавии баргузории конфронсу ҳамоишҳои сатҳи калону хурд аст.

Дар партави дастуру супоришҳои Сарвари давлат соҳиби меҳмонхона дар шафати он як ҳаммоми замонавиро мавриди истифодаи мардум қарор додааст. Соҳибкор Ҷ.Исмоилзода тасмим гирифтааст, ки дар фурсати наздик боз як маркази варзишии муосир бунёд намуда, ба истифода диҳад.