«НАВРӮЗ» СОКИНОНРО ХУШҲОЛ МЕСОЗАД

Яке аз гурӯҳҳои ҳунарие, ки ба хотири болидарӯҳии мардум рӯзҳои истироҳатӣ чорабиниҳои рангини фарҳангӣ доир мекунанд, ансамбли «Наврӯз»-и Донишгоҳи миллии Тоҷикистон мебошад. Тавре роҳбари ансамбли мазкур Аюб Ҳакимов иттилоъ дод дар ҳайати гурӯҳашон 10 нафар ҳунармандони касбӣ ва боқимондаҳо 20 нафар ҳаваскорон аз ҳисоби донишҷуён фаъолият мекунанд.

- Мо хатмкардаи Факултаи иқтисод ва идораи Донишгоҳи миллии Тоҷикистон ҳастем, ки айни замон дар ҳайати ансамбли «Наврӯз» кор мекунем, - мегӯянд хоҳарон Фотима ва Зӯҳро Худойбердиеваҳо.

Бахтиёр Раҳмониён сармутахассиси шуъбаи тарбияи ДМТ иброз намуд, ки ҷавонони донишгоҳ дар чорабиниҳои фарҳангии шаҳрӣ бо майлу рағбати зиёд ширкат меварзанд.

- Ансамбли «Наврӯз»-и Донишгоҳи миллии Тоҷикистон соли 1965 бо ташаббуси Амонқул Холиқназаров таъсис ёфтааст. Cоли 1966 аввалин бор иди Наврӯз дар Донишгоҳи миллии Тоҷикистон бо ташаббуси ансамбли «Наврӯз» чун иди миллӣ ҷашн гирифта шуд ва пас аз он даста рамзӣ «Наврӯз» унвон шуд. Намояндагони даста дар чорабиниҳо ва фестивалҳои дохиливу хориҷӣ ширкат варзида, борҳо сазовори баҳои баланд гаштаанд, - мегӯяд ҳамсуҳбатам.

- Мо худро насли хушбахт ва саодатманд мешуморем. Сарбаландем, ки ҳар шоми шанбеву якшанбе дар назди сокинони пойтахту меҳмонон ҳунарнамоӣ мекунем. Ҳоло бошад барои сазовор пешвоз гирифтани Ҷашни Ваҳдати миллӣ омодагӣ ҳамаҷониба гирифта истодаем. Дар барномаи консертиямон суруду таронаҳо дар васфи ватан, дӯстӣ ва ваҳдат омода шудааст, - мегӯяд Ганҷина Сафарова сарояндаи ҷавони ансамбл.

Д.САФАР