МАМЛАКАТИ ГАРМТАРИНИ ҶАҲОН

Дар давраҳои пеш шумораи аҳолӣ ба иллати вуруди муҳоҷирони ғайриқонунии меҳнатӣ боло мерафт. Қатар аз ҷиҳати захираҳои гази табиӣ дар ҷаҳон сеюмин кишвар ба ҳисоб рафта, бузургтарин содиркунандаи масолеҳи нафтӣ дар олам дониста шудааст. Аммо феълан вазъият тағйир ёфта, муҳоҷират аз кишвар зиёд шуда, афзоиши аҳолӣ баръакс поён меравад. Миқдори умумии сокинон ду миллион арзёбӣ мешавад. 70 фоизи сокинонро мардон ва 30 фоизашро занон ташкил медиҳанд. Умри миёнаи мардум дар ин кишвари гармтарин беш аз 70 сол нишон дода мешавад.

Истихроҷи нафт ва газ 50 фоизи маҷмӯи маҳсулоти дохилӣ ва 70 фисади қисми даромади буҷети давлатро ташкил медиҳад. Ҳамчунин саноати металлургӣ низ тараққӣ кардааст. Соҳаи кишоварзӣ на бештар аз 10 фоизи талаботи кишварро таъмин мекунад. Зеро бештари қаламрави Қатар аз биёбон иборат аст. Иқлимаш хушк буда, рӯд надорад ва обаш кам аст. Аз ҳамин лиҳоз оби баҳрро тавассути полованҳои махсус ширин менамоянд. Манбаъҳои зеризаминӣ дар қисмати шимолӣ ҷойгир мебошанд. Олами ҳайвоноташ низ маҳдуд буда,танҳо аз мору калтакалос ва ҷонварони хоянда иборат аст. Ҳарорати ҳаво ҳатто дар фасли сармо то 25-28 дараҷа боло меравад. Дар тобистон бошад, гармии ҳаво ба 40 дараҷа баробар мегардад.

Соли 2022 Қатар мизбони мусобиқоти Ҷоми ҷаҳонии футбол интихоб гардидааст. Аз сабаби гармии зиёд бо таҷҳизоти сардкунӣ маҷҷаҳаз гардонидани майдонҳои футболро ба нақша гирифтаанд. Ҳамчунин эҳтимоли дар фасли зимистон гузаронидани мусобиқаи мазкур истисно намешавад.

Мадина