АҶИБ

Дар Русия аввалин мӯйхушккунакҳоро на танҳо барои хушккунии мӯй, балки барои табобаткунии ревматизм, подагра ва дигар бемориҳои бо гармӣ табобатшаванда, инчунин барои хушккунии мӯи ҳайвоноти хонагӣ, хушккунии пойафзол, ҷойпӯшҳои хоб истифода мебурданд. Дар замони мо намуди мӯйхушккунакҳо дигаргун гашта, машҳуртарини онҳо ба ширкатҳои дар ҷаҳон маълум «Валера, Ровента, Витек, Филипс, Панасоник, Ремингтон» мансубанд. Мӯйхушккунакҳои муосир сабуквазнанд ва иқтидори баланд дошта, на танҳо мӯйҳоро хушк, ҳамчунин онҳоро ба тартиб медароранд. Имрӯз дар бозору мағозаҳо мӯйхушккунак-дарзмол барои кашидани мӯйҳо фурӯхта мешаванд. Агар танаи он аз метал бошад, дар ҳолати мунтазам истифодабарӣ мӯйҳоятон зарар диданашон мумкин аст. Дар вақти харидорӣ намудани мӯйхушккунакҳо ба якчанд маслиҳатҳои мо диққат диҳед. Танаи мӯйхушккунак бо пластмаси ба гармӣ тобовар сохта шуда бошад. Мӯйхушккунак бояд филтр дошта бошад. Дар ҳолати набудани филтр мӯйхушккунакҳо тез гарм ва ифлос мешаванд. Бояд мӯйхушккунакҳо  дорои реҷаи гуногуни корӣ бошанд, то  шумо ҳарорат ва иқтидори ба худ қулайро интихоб намоед.

Азизон! Мехоҳед мӯйхушккунаки харидорӣ намудаатон ба Шумо солҳои дароз хизмат намояд? Пас,  маслиҳатҳои моро  шунавед. Мӯйхушккунакро бештар  дар фасли тирамоҳу зимистон истифода баред, беҳтар аст. Мӯйхушккунакҳоро зуд пас аз шустани мӯй истифода набаред. Гузоред, ки мӯйҳоятон камтар хушк шаванд. Масофаи байни мӯйхушккунак ва сари шумо бояд 30 сантиметрро ташкил диҳад. Агар  пӯсти саратон хушк бошад, мӯйхушккунакро  камтар  истифода баред, то он сабабгори пайдоиши сабӯсаки сар нагардад. Хушк намудани мӯи сари кӯдакон бо мӯйхушккунак  мумкин  аст, лек зарурияти мунтазамро надорад. Ҳар қадаре, ки мӯйхушккунакро дертар истифода баред, ҳамон қадар беҳтар аст.

  Гулноз