РЕЗААХБОР

Дар назди яке аз чойхонаҳои назди соҳили Сирдарё Академияи хӯрокҳои миллӣ таъсис дода мешавад. Ба гуфти масъулини шуъбаи фарҳанги шаҳри Хуҷанд мақсад аз таъсиси академияи мазкур эҳёи чойхонаву хурокҳои миллӣ ва муаррифии он ба ҷаҳониён мебошад.

Соли 2012 дар қаламрави вилояти мухтори Куҳистони Бадахшон 73 иншооти аҳамияти иқтисодиву иҷтимоӣ дошта, ба истифода дода шуданд.

Тоҷи «Маликаи хурдакаки ҳунари сол»- и шаҳри Хоруғро Нилуфар Шукрихудоеваи 6 сола соҳиб гардид. Ба гуфти роҳбари ҳакамон Аспармо Хурсандова, озмуни «Маликаи хурдакаки ҳунар» барои дарёфт ва рушди истеъдодҳои хурдсол, тарбия ва омӯзиши онҳо дар руҳияи ватандӯстӣ, арзишҳои миллӣ ва зебоипарастӣ нақши муҳим мебозад.

Бо таъсиси марказҳои фарҳангии ҷавонон дар деҳоти ноҳияи Шаҳритус афкори умум оид ба масоили ҳалталаби ҷомеа мавриди омӯзиш қарор мегирад. Ба гуфти Лутфия Ҷӯраева, муовини раиси ин ноҳия, марказҳои фарҳангии ҷавонон, ки бо мақсади маърифатнокии ҷавонон ва рушди деҳот бунёд мегарданд, дар оянда ба марказҳои рушди ҷавонон табдил меёбанд.

Дар як соли охир, дар шаҳри Кӯлоб 17 корхонаҳои хурду калон ба фаъолият шуруъ кардаанд, ки дар онҳо 400 шаҳрванд бо ҷойи кор таъмин шудаанд. Дар назар аст, ки соли 2013 дар Кӯлоб 35 корхонаи хурди саноатӣ сохта ба истифода дода шавад.

Соли 2012, тақрибан 2000 шаҳрвандони бекори шаҳру навоҳии минтақаи Кӯлоб ба омӯзиши касбҳои гуногун фаро гирифта шуданд.