ЗАНИ ХУШБАХТ КИСТ?

«Зане, ки дар оила бо ҳамсараш ҳамфикр асту тавонистааст ҳамдигарфаҳмиро чун сутуни аслии пойбарҷоии оила ҳифз намояд, зани хушбахт аст. Эҳтироми шавҳарро соҳиб шудану дар навбати худ ӯро эҳтиром кардан, фарзандонро дар муҳити ороми хонаводагӣ ба воя расонидан, аз рукнҳои аслии хушбахтии зани тоҷик аст».

Гулбаҳор Зокирова,

муовини раиси ноҳияи Кӯҳистони Мастчоҳ

«Замоне ман фикр мекардам, ки зани хушбахт онест, ки соҳибмаълумот асту аз нигоҳи иқтисодӣ ба мард ниёз надорад. Ба истилоҳ аз паи «карера» шуда, дар хусуси оилаву оиладорӣ намеандешад. Аммо имрӯз ба хулосае омадаам, ки хушбахтии воқеии зан дар ҷомеаи шарқӣ танҳо дар муҳити оилаи солим фароҳам меомадааст».

Шаҳло Сафарзода,

тоҷикдухтари муқими Амрико

«Мегӯянд, ки барои хушбахт шудани як бону доштани диплом муҳим аст. Аз нигоҳи ман муҳим нест, ки ҳамаи занҳо дар донишгоҳ таҳсил бикунанд. Аз таҷрибаи калонсолон омӯхтану ибрат гирифтан кифоя аст, ки зан худро барои гузоштани гомҳои устувор дар зиндагӣ омода созад. Занҳое ҳастанд, ки ҳеҷ маълумоте ба ғайр аз омӯхтаҳояшон дар мактаби миёна надоранд, вале аз ҳаёт он қадар баҳра бардоштаанд, он қадар ҷаҳонбинию диду назарашонро тақвият додаанд, ки дар сӯҳбаташон мешинию ангушти ҳайрат мегазӣ».

Алишер Зарифов,

н.Шӯрообод

«Зани хушбахт дар оилаву ҷомеа аз ӯҳдаи иҷрои рисолаташ, яъне Модар будан, мебарояд. Рисолати аслии зан дар зиндагӣ тарбияи хуб ва накӯи фарзандон аст. Гузашта аз ин, зан бояд бомаърифат бошад, то дар пешрафти ҷомеа саҳм гузорад».

Шаҳло Саидалиева,

муовини раиси ноҳияи Шаҳристон

«Вақте зан аз ҷониби шавҳар ғамхориву дӯстдорӣ эҳсос мекунаду суханони «сеҳрнок»-и «Офарин!», «Беҳамтоӣ!», «Ягонаӣ!», «Дӯстат медорам!»-ро то ҳади имкон баҳраш арзонӣ медоранд, ӯ худро хушбахттарин зан меҳисобад.

Ҷамшед Каёнӣ,

хизматчии давлатӣ

«Хушбахт занест, ки соҳиби хонаи ободу фарзандони солеҳ асту зиндагиаш ҳам марому сомони муайяне дорад».

Ёқуби Саид,

Журналист

Зане хушбахт аст, ки шавҳари хуб дорад ва фарзандони боимону боинсофро тарбия мекунад. Ба пастиву баландии рӯзгор тобовару дар бурду бохт таҳаммулпазир аст.

Гулафшони Зарафшонӣ,