ЯК СОЛИ БО МО БУДАН

Чун пешорӯи Соли нав қарор гирифтаем, хостем андешаҳои хонандаи гиромиро нисбати як соли бо мо будан фаҳмем, ки оё ӯ дар ин сол аз мо розӣ буд ё хайр? Оё маҷалла тавонистааст дар ин сол рисолаташро назди ҷомеа ба дурустӣ анҷом дода бошад? Бо ин мақсад андешаи чанде аз хонандагони хушбину хушзавқро сари ин мавзуъ пурсон шудем:

«Барои ман дар ин сол мусоҳибаи бисёр хондание бо бонуи шинохта Руқия Қурбонова, ки «Шукргузорам аз тақдир» унвон дошт, писанд омад. Вақте дар бораи зане мехонӣ, ки азму ҷасорати мардӣ дорад, шод мешавӣ, ифтихор мекунӣ. Аз ин мусоҳиба барои худ маълумотҳои аҷибе пайдо намудам. Шумори занҳое, ки дар барқарорсозии сулҳу ваҳдати кишвар саҳм доштаанд, хело зиёдтар аз оне будаст, ки мепиндоштам. Ба аҳли эҷоди маҷаллаи дӯстдоштанӣ дар Соли нав барору комёбиҳои тоза мехоҳам».

Ризоева Умеда - духтури чашм,

н.Шаҳристон

«Мақолае бо номи «13 сол вазиру 17 сол вакил» бароям ҷолибу хонданӣ буд, ки дар хусуси шахсияти бону Адолат Қосимова ёдовар мешуд. Ин гуна мақолаҳо барои бонувони ҷавони мо як дарси ибратест, ки хонанда бо баробари ошно шудан бо кору пайкорашон орзуи пайравӣ ба қаҳрамонро мепарварад. Дар Соли нав ба дастандаркорони маҷаллаи хонданӣ пешниҳоде дорам, бештар дар бораи модарони мардони бузург ва занҳои эшон мақолаҳо нашр намоед. Ногуфта намонад, ки саҳфаи таъому хӯришҳоятон барои мо бонувон хело писанд аст».

Қурбонова Саломат - муаллима,

н.Хуросон

«Мақолаҳои хонданӣ зиёд буданд. Бештар мақолае бо номи  «Иҷлосияи тақдирсоз», ки моҳи ноябри имсол дарҷ шуд, диққатамро ҷалб намуд. Аз он маълумотҳои заруриро барои худ пайдо намудам. Шеъри бисёр таъсирбахше дар он шумора мутолиа намудам, ки бо унвони «Мавлуди Ватан буд», чоп шуда, ки мешавад онро намунае аз шаъри олии имсола ҳисобид».

Шехова Дилраста, рӯзноманигор,

н.Ванҷ

«Мақолае бо номи «Имрӯзи бонувони Ашт» моҳи август нашр шуда буд, ки дар хусуси зисту зиндагонии бонувони Ашт бисёр маълумотҳои аҷибе пешниҳод шуда буд. Аз ҷумла, масъулини ин ноҳия барои баланд бардоштани фарҳанги оиладорӣ чӣ қадар озмунҳои зиёде роҳандозӣ кардаанд, ки мешавад ин иқдомро чун дастурамали хубе байни дигар шаҳру ноҳияҳо истифода бурд».

Набиева Азиза, муаллимаи ДДТХ

н.Данғара

«Саҳифае доред бо номи «Зан ва ҳуқуқ», ки он ҷо занон бо мушкили ҳуқуқии худ муроҷиат мекунанд ва маслиҳати лозимаро аз ҳуқуқшинос мегиранд. Рӯи кор омадани ҳамчунин саҳифа барои мо занон беҳтарин иқдом буд».

Ёдгорова Ситора,

корманди Маркази идораи лоиҳаҳои

энегнтикӣ дар шаҳри Душанбе