ХУБ ШУД, КИ ЗАН БА ДАВЛАТ ЁР ШУД

Ӯ аз соли 2005 раиси маҳаллаи рақами 24 мебошад.

Руқия ҳамеша дар ҳар бурду бохти ин маҳалла худро масъул меҳисобад. Аз дигаргунӣ ва дастовардҳои сокинон ва ҳудуди маҳал ҳамеша шодмонӣ мекунад аз ғалату хато, корҳои ношоистаю номатлуби одамон ғамгин мешавад. Дар сӯҳбату нишастҳо, бо сокинони маҳаллаи рақами 24 ҳамеша сухан аз боби ахлоқу рафтори нек, ва Қонуну қарорҳои Ҳукумату Давлати Тоҷикистон мегӯяд. Руқия ҳамеша дар бораи Қонуни Ҷумҳурии Тоҷикистон «Дар бораи танзими анъана ва ҷашну маросимҳо» ва Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» бо сокинони маҳалла сӯҳбатҳо доир карда, кӯшиш мекунад, ки тамоми чорабинӣ ва ҷамъомадҳояш судманд, ба манфиати мардум бошад.

Маҳз бо кӯшишу заҳмати ӯ имрӯз мардуми маҳалла ҳангоми гузаронидани маъракаву маросимҳои худ дар доираи қонунҳои ҷоришуда фаъолият намуда, ба камбудию қонуншиканиҳо роҳ намедиҳанд. Тамоми чорабиниҳо: хатнасур, тӯйҳои хонадоршавӣ ва маросимҳои дафну мотам бо харҷи кам доир мегардад.

Дар маҳалла ду гӯшаи деҳқон фаъолият мекунад, ки маҳз бо кӯшиши ӯ бунёд гардида мардумро дар чор фасли сол бо маҳсулоти тару тоза таъмин менамоянд.

Вобаста ба пешниҳодҳои Президенти мамлакат ва Раиси шаҳри Душанбе оиди сарсабзгардонӣ ва бунёди боғҳои нав, ӯ дар ду гӯшаи маҳалла ду боғ бунёд кард. Заминҳоеро ки санглоху партовҷо буданд, ба гулистон табдил дод.

Ӯ ҳамчун зан, модари се фарзанд низ ҳаст. Дар тарбия ва касби камоли фарзандон ҳам заҳмат кашида онҳоро соҳиби касбу  ҳунар кардааст.

Ӯ аз соли 2005 узви Ҳизби Халқии Демократии Тоҷикистон аст.

Тарғибу ташвиқи ғояҳои ҲХДТ ҳамчун ҳизби созанда ва ҷомеаофар ба кори муқаррарии ӯ табдил ёфтааст. Тамоми дастовардҳои навини кишварро аз заҳмату талошҳои пайвастаи Раиси ҳизб муҳтарам Эмомалӣ Раҳмон арзёбӣ мекунад. Маҳз бо мақсади дастрасии иттилоотӣ оиди чорабинӣ ва дигаргуниҳо дар раванди кори ҳизб нафарони зиёд бо тарғиби ӯ ба узвияти ҲХДТ пайвастанд.

Мо ба Руқия Латипова ва фаъолияти минбаъдаи ӯ барору комёбӣ таманно мекунем.

Маҷнуни КАРИМ