НИЗОМӢ БУДАН ПЕШАИ ЗАН АСТ?

Генерал майор Эмомалӣ Собиров

Фармондеҳи қӯшунҳои хушкигарди Вазорати мудофиа

Дар хизмати ҳарбӣ занон пурмасъулият мебошанд. Дар вазифаҳои гуногун кор мекунанду натиҷаҳои хуб нишон медиҳанд. Пеш аз ҳама дар корҳои тарбиявӣ, ҳуҷҷатгузорӣ, идораи зершуъбаҳои махфӣ ва тарҷумонӣ муваффақанд.

Дар донишкадаи ҳарбии Вазорати мудофиа факултаи махсусе, ки аз занҳо мутахассис тайёр кунад нест, аммо хоҳишмандон метавонанд дар Федератсияи Русия маълумоти ҳарбӣ гиранд.

Ҳанӯз ҷомеа тайёр нест, ки дар симои фармондеҳ занро бинад. Вале дар ояндаи наздик имкон дорад, ки бонувони мо ба вазифаҳои баландтару пурмасъулияттар гузаранд.

Бонувоне, ки дар Вазорати мудофиа кор мекунанд, ба монанди занҳои Амрикову Аврупо дар паҳлуи дигар афсарон метавонанд Ватанро ҳимоя намоянд.

 Орзуи мо ин аст, ки тинҷиву оромӣ ва сулҳу амонӣ пойдор бошаду бар дӯши занҳои меҳрубони мо кори дигаре бор нагардад.

Полковник Баҳром Усмонов

Сардори Раёсати кадрҳо ва таълимоти ҳарбии Вазорати мудофиа

Дар сохторҳои Вазорати мудофиа ва ҳамзамон дар тамоми Қувваҳои Мусаллаҳи кишвар теъдоди зиёди бонувон адои вазифа карда, то мансабҳои роҳбарикунанда ва қумондонҳои қисмҳои низомӣ расидаанд. Масалан, полковник Назармоҳ Хушназарова, сардори шуъба, муовини сардори Раёсати молия ва буҷети вазорат, полковник Тамара Усмонова, қумондони қисми ҳарбӣ, сардори госпитали ҳарбии марказии вазорат, полковник Марзия Фатурова, сардори маркази ташхиси тибби ҳарбии вазорат, полковник Гавҳар Нодирова, сардори дармонгоҳи Вазорати мудофиа, подполковник Наргис Худоиева, сардори кафедраи забонҳои Донишкадаи ҳарбии вазорат мебошанд. Бонувон дар комиссариатҳои ҳарбӣ, раёсатҳо, дар дастгоҳи Вазорати мудофиа низ дар вазифаҳои масъул кор мекунанд.

Полковник  Хусрав Музайянов

Сармуҳаррири ҳафтаномаи  «Ҳомии Ватан»

Муҳофизати Ватан ва хизмат дар сафҳои Қувваҳои Мусаллаҳ кори басо мушкил ва дар айни замон пуршараф аст. Бахусус, барои занони низомӣ, ки дар баробари кори рӯзгор ва тарбияи фарзанд вазифаи сах-теро бар дӯш доранд. Бо вуҷуди маҳрумиятҳову мушкилиҳо дар қатори мардон хизмат кардани бонувон мардонагӣ аст. Ба гуфти шоир:

Сано бод ба занҳое, ки марданд,

Байёзи зиндагиро байти фарданд,

Ба номардон бидода дасти мардӣ,

                                                 Вале ҳусни заниро кам накарданд.

Кор дар соҳаи низомӣ одамро руҳану ҷисман обутоб медиҳад ва ба ҳама сахтиҳои зиндагӣ тобовар мекунад.

Дар ҳоли ҳозир зиёда аз 300 нафар бону дар сафи Қувваҳои Мусаллаҳ, госпитали ҳарбӣ, дармонгоҳи ҳарбӣ, дастгоҳи марказии Вазорати мудофиа ва Ситоди генералӣ кор мекунанд. Дилсӯзӣ ва муносибати эҳтиёткорона нисбати кор аз вижагиҳои бонувон буда, дар ҳама соҳаҳо нисбат ба мардон муваффақтаранд. Супоришҳоро нисбати мардон зудтару беҳтар иҷро менамоянд.

Дар Клуби марказии варзишии артиш бисёр бонувон хизмат карда, дар мусобиқаҳои байналмилалӣ кувваозмоӣ менамоянд. Соли гузашта капитан Сурайё Имомназарова дар мусобиқаи байналхалқӣ оид ба варзиши сабук дар Қазоқистон ширкат намуда, дар байни кишварҳои ИДМ ҷойи аввалро ишғол намуд.

Полковник  Шариф Юсуфов

Афсари калони шуъбаи таълимоти ҳарбии Раёсати кадрҳо ва таълимоти ҳарбии Вазорати мудофиа

Дар Вазорати мудофиа бонувон дар вазифаҳои роҳбарикунанда, сардорони шуъбаҳо ва дигар вазифаҳо сарбаландона хизмат мекунанд. Сол ба сол сафи бонувони низомӣ дар Қувваҳои Мусаллаҳ меафзояд, ки ин аз пешравию бедории онҳо шаҳодат медиҳад. Вазифаҳояшонро сарбаландона иҷро мекунанд.

Полковник  Хусрав Аминов

Сардори шуъбаи кор бо ҷавонони Раёсати кор бо ҳайати шахсии Вазорати мудофиа

Зани қаҳрамон, суханвар ва бунёдкор дар зиндагӣ барои башарият хидматҳои бузург анҷом додааст. Саҳми Гурдофаридҳои тоҷик дар пешрафти Артиши миллӣ бузург аст. Занон дар Қувваҳои Мусаллаҳ бештар дар соҳаи тиб ва алоқа фаъолият доранд. Солҳои охир бонувон баробари мардон кор карда, то вазифаи сардори шуъбаву раёсатҳои марказӣ ва қумондонҳои қисмҳои ҳарбӣ расиданд. Махсусан, полковникҳо Ҳусния Хушдилова, Мавлуда Шониёзова, Саида Наҷмиддинова, Марзия Фатурова намунаи ибратанд. Баъзеҳо бар онанд, ки низомӣ будан кори зан нест. Фикр мекунам, устод Лоиқ ба онҳо посухи шоиста гуфтааст:

Занон мардона гоҳо ишқ варзанд,

Заифиҳои мардонро чӣ гӯям?