МЕҲРИ ВАТАН

Ғаффорова Ҳуснигул :

            Ба хотири хубтар омӯхтани забон соли 2012 ба Русия сафар кардам. Сад шукри пайвандон, ки бо дастгириву ёриашон соҳиби ҷои зисту кори арзанда ҳам шудам. Метавон гуфт, ки ин сафар дар ҳаёти ман нақши муҳиме бозид. Қадаме дар соҳаи илм ба пеш гузоштам ва ҳам тавонистам то андозае мушкили молии оилаамро бартараф созам. Чун дар ғурбат ҳамеша бо ёди Ватан мезистам, меҳраш маро боз ба хоки Ватан овард.

Муҳаббатшоева Нисо, донишҷӯ:

             Имконе даст доду дар соли чаҳоруми таҳсил банда бо кӯмаки барномаи «Au-pair» тавонистам бо сафари як сола ба Олмон биравам. Гумон мекунам таассуроти бардоштаам аз ин сафар барои як умр кофист. Маданияти баланду одобу тамкини махсуси мардуми ин ҷо ба ман бисёр писанд омад. Пешрафтҳои назаррасеро дар соҳаи техникаву технология шоҳид будам. Ҳарчанд дил мехост ҳамқадами ин раванд бошам ва имкони барои муддати муайяне он ҷо монданро ҳам доштам, аммо меҳри Ватану наздикон маро боз ба Тоҷикистон овард.

Мадина Ҳафизхонова, аспирант:

             Муддате дар шаҳри Берлин ва як қатор шаҳрҳои дигари Олмон будам. Аз рӯи мушоҳидаҳоям қисми зиёди муҳоҷиронро дар Олмон туркҳо, арабҳо ва мардумони дигар қавму миллатҳо ташкил медиҳанд. Дар Олмон қонунгузорӣ барои муҳоҷирон шароитҳои хуби маишиву кориро кафолат додааст. Он ҷо ҳама новобаста аз мансубияти динниву нажодӣ ва миллату қавм баробаранд. Хотираҳои неке аз ин сафар бо худ овардаам.