ХОСТАҲОИ БОНУВОНИ ФАЙЗОБОД

            Ҳамчунин, зимни ин вохӯриҳо мавзӯҳои дастовардҳои солҳои истиқлол, маъракаҳои сиёсии дарпешистода, пешгирии зуҳуроти номатлуб дар ҷомеа, хушунати хонаводагӣ, пешгирии талоқ ва оилавайроншавӣ, нашъа ва нашъамандӣ, ҷинояткорӣ миёни занону духтарон, хариду фурӯши одамон, пешгирии никоҳи бармаҳал ва никоҳи хешовандӣ, сарфакорӣ ва истифода аз таҷҳизотҳои каммасрафи барқӣ, аз мактаб дур мондани духтарон, пешгирии бемориҳои сироятӣ миёни занон, бемории саратони ғадуди сина, пешгирии ҳамли номатлуб, идомаи таҳсилу касбомӯзии духтарон мавриди баррасӣ қарор мегиранд.

            Боиси қайд аст, ки иштирокчиён дар рафти вохӯриҳо фикру пешниҳодҳои ҷолибе дар хусуси иҷроиши Қонунҳои Ҷумҳурии Тоҷикистон  «Дар бораи танзими анъана ва ҷашну маросимҳо дар Ҷумҳурии Тоҷикистон», «Дар бораи масъулияти падару модар дар тарбияи фарзанд» ба миён мегузоранд. Масалан, сокини деҳаи Элоки ҷамоати деҳоти Қалъаидашт Саида Абдуллоева бар ин назар аст, ки яке аз сабабҳои риоя нагардидани қонуни танзим аз бемасъулиятию беназоратии худи масъулони ин қонун сарчашма мегирад.

            Дар баробари ин бонувони деҳот ба масъулин пешниҳод доранд, ки дар мактабҳо соатҳои дарси одобнома зиёд ва дар деҳаҳо нуқтаҳои фиттафурӯшӣ кам карда шаванд. Аксарият мехоҳанд дар марказҳои деҳот сеху корхонаҳое сохта шаванд, ки бонувони маҳалро бо ҷойи кор таъмин карда тавонанд. Ҳастанд нафароне ҳам, ки аз ноадолатиҳо дар тақсимоти замин шикоят доранд.

Р. Назиров