ТАВАҶҶӮҲ: ОЗМУН! «Чеҳракушоӣ»-и мардона

Ба истиқболи 20-солагии Истиқлолияти давлатии Ҷумҳурии Тоҷикистон маҷаллаи «Бонувони Тоҷикистон» тасмим гирифт, ки бо мақсади кушодани даричаи ошноӣ бо ҳаёт ва фаъолият, ҳунару истеъдод мавқеву малакаи бонувони сазовори тоҷик маҳфиле , зери унвони «Чеҳракушоӣ» боз кунад. «Бонувони Тоҷикистон» тавассути ин озмун 20 бонуи сазовори мавқеъ ва мансабро, ки тули 20-соли соҳибистиқлолӣ сабзидаанд ба ҷомеъа ошно кардаву собит карданист, ки мақоми зан дар ҷомеъа воқеист.

Зимни роҳандозии ин иқдом аз мардон – сармуҳаррирони нашрияҳои даврӣ ва якчанд нафар қаламкашони саршиноси тоҷик дархости матлабест, ки муаррифии як чеҳраи нокушода, як шахсияти ноаён, як гавҳари миёни садаф пинҳон бошад. Чеҳраи нокушода, шахсияти ноаён, гавҳари миёни садаф пинҳоне, ки барои бунёди ҷомеаи воқеан навин аз шумули садрнишинон буда метавонаду ҷомеа ҳанӯз ӯро нашинохтааст.

Ҳадафи ин иқдоми минбари бонувони кишвар афзудани сафи занонест, ки дар қабули қарорҳо ширкат доранд. Ва боз - собит намудан, ки дар ҷомеаи ҳуқуқбунёд ва демократии Тоҷиқистон баробарии гендерӣ воқеист. Мақсади сеюм – бо ҷамъбасти озмуну қадршиносии ғолибон ва интихоби чеҳраҳои тозаву тобон дар рушди бештари кишвар саҳм бигирему нанолем, ки чаро занҳои сазовор аз назарҳо дуранд?

Ба даври якуми ин озмун чанд  нафар мардони соҳибқалам, ки ҳамеша аз интихоб ва ҷобаҷогузории кадрҳо нигаронанд, вале хеле кам перомуни истеъдоди занон менависанд, даъват мешаванд. Яъне, бо даъвати ин қаламкашон ва интишори сурату вазифаашон дар саҳифаи маҷалла аз онҳо масъулиятеро низ пеши хонандава умуман аҳли ҷомеа хоҳонем.