НИГОҲУБИНИ ПӮСТИ РӮ, ДАСТ ВА МӮЙҲО

Дар фасли тирамоҳ ва зимистон маҳсулоти ғанӣ аз витаминҳоро истеъмол намоед. Витамини А дар мавсими сармо пӯстро аз хушкшавӣ ҳифз мекунад. Ин витамин дар таркиби ҷигари гов, кабудӣ ва сабзиву помидор мавҷуд аст. Витамини D дар бадани инсон фосфор ва калтсийро нигоҳ медорад. Ҷигари моҳӣ, равғани моҳӣ, ҷигари гов, зардии тухм ва равғани маска витамини мазкурро ба таркиб доранд.

Малҳам барои пӯсти рӯ

Зардии тухмро бо як қошуқи майда равғани зайтун ва як қошуқи майда усораи бобуна (экстракт ромашки) якҷоя намоед. Ин намуди малҳам пӯсти рӯйро аз шамолу барф эмин медорад.

Каду бо қаймоқ: каме кадуи тару тозаро аз турбтарошак гузаронда бо қаймоқ омехта карда, ба рӯятон гузоред. Баъд аз 20 дақиқа онро бо оби ширгарм шӯед.

Шири бурида (творог): 2 қошуқи ошхӯрӣ шири буридаро бо зардии тухм ва як қошуқи ошхӯрӣ кӯфтаи биринҷи сафед омехта намоед. Онро ба рӯй ва гардан молед. Баъд аз 10 дақиқа онро шӯед.

Малҳам барои пӯсти равғанӣ: сафедии тухмро кӯфта, ба он як қошуқи майда афшурдаи лимӯро омехта намоед. Сипас онро ба рӯй молед.

Барои пӯсти хушк: як қошуқ бобунаи дорухонагиро бо як қошуқ барги зулф омехта карда ҷӯшонед. Як қошуқи майда хокаи картошкаро омехта, сипас малҳамро ба рӯй бимолед.

Малҳам барои пӯсти даст: чор қошуқи калон глитсерин, як қошуқи дигар афшураи лимӯ ва боз ҳамин қадар хокаи картошкаро омехта, шабона ба даст­ҳоятон молед.

Тадбири нармсозии пӯст ва рафъи илтиҳоб: 1 қошуқи ошхӯрӣ барги зулф, як қошуқ бобуна ва ба ин миқдор гули ҷаъфариро дар истакони моломоли оби ҷӯш муддати як соат тар намоед. Баъдан як қошуқи ошхӯрӣ глитсеринро рехта, дар як рӯз ду ё се маротиба ба даст­ҳои худ бимолед.

Малҳами серғизо барои пӯсти хушки даст: як қошуқи ошхӯрӣ барги зулф, як қошуқи ошхӯрӣ бобуна ва як қошуқ гули ҷаъфариро дар истакони оби ҷӯш рехта, як соат дам диҳед. Баъд як қошуқи хурд асал ва 50 грамм равғани маскаро омехта, бо малҳам як маротиба саҳар ва як бори дигар шаб пӯсти даст­ро маҳс кунед.

Нигоҳубини мӯйҳо

Дар фасли сармо лозим аст дар як ҳафта 1–2 маротиба аз малҳамҳои табиӣ дар шароити хона омодакардашуда барои мӯйҳоятон истифода намоед. Барои мӯйи сарро мустаҳкам кардан маҳсулоти зерин лозим меояд:

1 истакон ҷурғот;

1 истакон қаймоқ;

0,5 истакон афшураи ҷӯшондаи бобуна;

2–3 қатра сиркои себӣ.

Ҳамаи ин маҳсулотро омехта, ба мӯйи сар молед ва пас аз 30 дақиқа онро шӯед.

Малҳам барои мӯйи хушк: як дона бананро бо як дона зардии тухм ва ду қошуқи ошхӯрӣ равғани растанӣ омехта, муддати 30 дақиқа дар сар нигоҳ дошта, баъд бо оби ширгарм бишӯед.

Малҳам барои ҳама намуди мӯй: ду дона картошкаро аз турбтарошак гузаронда бо ду қошуқи калон қаймоқ омехта кунед. Малҳамро ба сар молида, кулоҳи полиэтилениро ба сар пӯшида, онро муддати 30 дақиқа нигоҳ доред. Баъд бо оби ширгарм бишӯед.

Таҳияи МАДИНА