Хатари фалаҷ бартараф шуд

Ин иттиллоъро Нусратулло Салимов, вазири тандурустии кишвар дар нишасти матбуотие, ки  14 июли соли равон дар вазорати тандурустӣ баргузор шуд, хабар дод. Ҳамчунин вазир дар мавриди вазъи солимии ҷомеа, бахусус кӯдакон маълумоти мухтасар пешниҳод намуд ва иброз дошт, ки аз 23 июни соли ҷорӣ ҳодисаи гирифторшавии кӯдакон ба бемории фалаҷи шадид ба қайд гирифта нашудааст, ҳарчанд хавфи гирифторӣ ҳамеша вуҷуд дорад. Хавфи дубораи сар задани ин беморӣ дар деҳаҳои наздисарҳадии мо бо Ҷумҳурии Афғонистон вуҷуд дорад. Дар чор давра 99,7 фоизи кӯдакони ҷумҳўрӣ пурра дар муқобили ин беморӣ эм карда шуданд. Масъалаи дигаре, ки рӯзноманигорон аз вазири тандурустии кишвар пурсон шуданд ин вазъи гирифторони ВНМБ (СПИД) мебошад. Бинобар иттиллои вазири тандурустӣ айни замон дар ҷумҳурии мо 2204 нафар сироятёфтагони ин беморӣ ба қайд гирифта шудаанд ва аз ин ҳисоб 486 нафар бо табобати зиддиретровирусӣ фаро гирифта шудаанд. 

Моҳшарифи Холиқ